Halloween krukkur-aftur!

Já, ég hreinlega fékk ekki nóg af því að mála á krukkur þegar ég gerði kóngulóarkrukkurnar í síðustu færslu.

Svo ég smellti mér bara í næsta holl!

Núna ákvað ég að gera aðeins öðruvísi stíl

Það sem þarf:

Tómar og hreinar krukkur

málning

penslar

eitthvað til að setja málninguna á

kerti-ef þú ætlar að nota þetta sem kertastjaka.

Fyrsta skref: Mála krukkurnar

Ég fór bara eina umferð á hverja krukku, ég vildi sjá penslaförin og láta ljósið af kertunum koma almennilega fram.

Hérna eru komnar tvær krukkur. Ég notaði akrýl málningu frá Söstrene Grene (ég ætti að fara að fá laun hjá þeim fyrir að minnast svona oft á þær!) og þetta var rooosalega fljótt að þorna

Annað skref: Skreyta krukkurnar

Skrímsli Frankenstein: Ég málaði hár allan hringinn og tvö andlit, sitthvoru megin á krukkunni.

Grasker: Ég gerði líka tvö andlit á graskerið. Ég er alveg að fara að taka graskerin í sátt-í föndri en ekki í mat sko!

Síðan ákvað ég að prufa eitthvað annað og setti því málninguna í plastpoka svo hún myndi ekki þorna.

Svo teiknaði ég skuggamynd af norn á einhvern snepil. Það er líka hægt að prenta út ef fólk treystir sér ekki fríhendis.

Síðan er snepillinn settur ofan í krukkuna (sem var ennþá blaut að innan eins og sjá má)

Svo er bara að teikna myndina eftir myndinni. Það getur verið snúið að gera ráð fyrir kúrvunni á krukkunni. Sjáið hvað nornin á krukkunni er breiðari en þessi á miðanum?

Svo málaði ég. Nornin mín let út eins og önd með hatt! Ég þurfti að lengja nefið svo að það gæti sést hvað þetta væri...

Miðinn á ekki að vera ofan í , ég setti hann bara svo það væri auðveldara að sjá myndina.

Hinu megin gerði ég kött-hvað passar betur við norn en köttur? Já ókei...galdrakústur. Ég fíla ketti betur en hjálpartæki heimilisþifa svo ég valdi það frekar.

Svona er þetta með engum miða 

Tada! Rosa flott! Það sést illa á myndinni en nornin varpaði skugga á vegginn.

Og hin hliðin á krukkunum. Ég var ekki alveg sátt við þessa í miðjunni svo að ég breytti henni morguninn eftir (málningin var ekki enn þornuð, vafin í plastpoka)

Ég notaði gula málningu og hreinlega málaði yfir allt heila klabbið!

Svo bara málaði ég myndirnar aftur á. Ég er ekki alveg sátt við þessa norn. Finnst hún ekki nógu flott

En kisi er krúttlegur! Svo þetta reddast allt!

Hvað væri gaman við að föndra ef allt væri fullkomið í fyrsta skiptið? Ekkert.

Þar til næst

N

Hrekkjavökuföndur-krukkur!

Mjög líklega einfaldasta og fljótlegasta föndur sem við höfum nokkurntíman gert.

Það eina sem þarf er:

Krukka

Penni

Jebb. Tveir hlutir og málið er dautt!

Fyrsta skref: taka límmiðann af krukkunni:

Það eru til mörg húsráð við að taka límmiða af krukkum sem innihalda ýmist sítrónur, óhreinsað bensín eða eitthvað annað álíka eitrað. Ég á ekki eitthvað slíkt í hillunum í mínu þvottahúsi svo að ég nota bara heitt vatn. Læt renna heitt vatn á krukkuna og svo nota ég svamp með grófri hlið til að skafa miðann af-og límið fylgir með pappírnum!
Tada! ókeypis og umhverfisvænt!

Annað skref: teikna á krukkuna.

Ég var ekki með nógu góðan tússpenna í þetta. Ég mæli með gamla góð merkitússnum sem er möst til að merkja pappakassa þegar verið er að flytja. 

Við gerðum kónguló og hún var svo rosalega gegnsæ að við máluðum hana með málningu. 

Okkur fannst hún frekar líflaus svona svo við grömsuðum eftir gúggílí augum (hvað heitir þetta á Íslensku?) og..

Sjáidda kvikindi! Mikið betra!

Við gerðum bara þrjár krukkur í þessu holli, öll með einhverskonar kóngulóarþema. Síðan er bara að henda kertum ofaní og þá eru komnir þessir flottu kertastjakar! 

Ég sé fyrir mér að fylla þetta upp með appelsínugulum skrautsandi, þá fyrst verður þetta Hrekkjavökulegt!

Auðvitað þarf ekkert að gera kóngulær. Okkur langaði bara til þess. Núna safna ég krukkum og hef háleitar hugmyndir um drungalega kastala og skuggamyndir af nornum. Sjáum til hvernig það fer :)

Þangað til næst

N

Hrekkjavökuföndur úr klósettpappírsrúllum

Þar sem Halloween og afmælisdagur Elsta Barns er sirkabát á sama tíma (hvað eru sjö dagar á milli vina?) þá vildi frökenin endilega halda afmælisþema með Hrekkjavöku ívafi.

Mamma hennar er auðvitað stórhrifin af hugmyndinni því að:

A)Hrekkjavaka er svo rosalega skemmtileg og 

B)Það er hægt að föndra og skreyta svooo mikið!

Fyrir mig, sem klæjar í puttana að byrja að setja seríur útí glugga í Septemer er smá blóðslettur og beinagrindur alveg sárabót svona þangað til.

Hérna er eitt föndrið sem við gerðum, þessi fínu skrímsli sem voru einu sinni klósettpappírsrúllur!

Hrikalega einfalt og skemmtilegt föndur sem allir ættu að geta klúðrað saman á nó tæm!

Það sem þarf:

Tómar klósettpappírsrúllur

Málning í skrímslalitum

pensill

Ekki var það nú flókið! Ég notaði Akríl málningu frá Sösterne Grene því ég átti það til og það svínvirkaði!

Fyrsta skref: rífa mestallan afgangspappír af hólkunum. Þetta er ekki erfitt, ég nuddaði þetta bara af með fingurgómunum, tók engan tíma og engin efni. Ég gerði sex stykki á sirka þremur mínútum.

Annað skref: Grunna alla hólkana með hvítu. Frekar krúsjal að fara allaveganna eina umferð með hvítum svo litirnir sjáist betur.

Búin að grunna alla hólkana.

Þriðja skref: byrja að mála! Ég mæli með að mála hólkana í tvemur pörtum, það er svo leiðinlegt að mála allan hólkinn bara til að hann límist við dagblöð/borð/hvar sem hann er geymdur á meðan hann þornar. Málningin er fljót að þorna svo að það passar að þegar maður er búinn með þann síðasta þá er sá fyrsti þornaður.

Aðeins farið að koma mynd á þetta. Ef þið fílið allt voða minímalískt ætti þetta bara að duga svona.

Ég er ekki minímalísk. Ég lét þetta ekki duga og bætti smáatriðum í þetta.

Draugur: augu, munnur og smá botn svo að það sé eins og hann "fljóti" í lausu lofti. Ég hafði hann frekar dapran því það er eitthvað sorglegt við afturgöngur en það er auðvitað hægt að hafa hann með alla heimsins andlitsdrætti!

Grasker: Mér finnst grasker ofboðslega vond á bragðið, mögulega vegna skorts á Hrekkjavöku í minni barnæsku. Munnsvipurinn á mínu voða vonda graskeri endurspeglar það en þau geta verið allskonar á svipinn, alveg eins og draugurinn!

Vampíra: Þessi hrikalega krúttlega vampíra var bara ekki alveg að gera sig fyrir mig...

..svo ég sneri henni við og gerði annað andlit á hnakkann á henni. Núna er hún eins og Vonda Lögga í Lego Myndinni. Hægt að gera þetta við alla hólkana nema leðurblökuna, mæli með því ef það á að hengja þetta upp en mínum verður bara stillt upp í hillu.

Skrímsli Frankensteins: Saumar eru krúsjal í þessu! Gulu augun eru optional og húðliturinn líka. 

Leðurblaka: Leðurblökuna ÞARF ekki að grunna með hvítu! Bara mála svart og smá rauð augu og vígtennur. Mér fannst þetta ekki segja "leðurblaka" nógu skýrt svo að ég ákvað að bæta við vængjum. Fyrst setti ég hana á pappa til að sjá hversu stóra ég vildi hafa þá.

Síðan krotaði ég nokkrar línur á blað og klippti út (þetta er seríjós pakki, ekkert fansí)

Það sést illa en ég hafði "flipana" á vængjunum aðeins lengri en þurfti til að líma á hólkinn svo ég hefði eitthvað að halda í á meðan ég málaði, Henda einni til tvemur umferðum af svartri málningu yfir oooog...

...VOILA! Líma vængina aftan á og þú ert komin með fyrsta flokks leðurblöku. Fáránlega krúttleg þegar hún hangir niður úr loftinu!

Múmía: Mér fannst múmían ekki alveg nógu góð hjá mér svo að ég klippti niður smá ræmur af eldhúspappír og límdi með fljótandi lími. Ég notaði Mod Podge afþví að ég átti það en það er hægt að nota allt fljótandi lím.

síðan rétt dýfði ég penslinum í brúna málningu og svo á bólakaf í vatn. Ég rétt kom við pappírinn til og hann saug í sig allt brúna vatnið úr penslinum, múmíur eru jú soldið gulnaðar af elli. Bara muna að mála fyrst svartan ferhyrning og tvö stingandi gul augu!

Og hér eru þau öll, skrímslin mín sæt og fín

Fáránlega einfalt og fljótlegt föndur sem kemur vel út og er ákaflega barnvænt.

Þar til næst:

Föndur Nína :)